Google+ Badge

الجمعة، 18 ديسمبر، 2009

نشــدت عنك...




نشدت عنك نجوم نجد ونسيمه

ومن ساطع القمراء تحذيت الاخبار

ونشدت عنك مع السماء كل ديمه

ورحت استشف العلم من همس الازهار

ومريت بطلال القصور القديمه

اللي بها سجلت انا وانت تذكار

انشد وادور والاجابه عديمه

لاصوت جاوبني ولا دار ديار

ورجعت ازايم عبرتي والهزيمه

مكسور خاطر بالغ الحزن منهار

ضاق الفضاء واصبح بعيني خريمه

ماشوف لي معها بلياك معبار

وين انت ياتوم الحياة اليتيمه

فوق الثرى ولاعليك الثرى ثار

كان انت حي وفي ظروف سليمه

عزالله انك جرت يوم الزمن جار

ماتدري ان الهجر ظلم و جريمه

وان الجفاء في حق راع الوفاء عار

وكان انت ميت فالمصيبه عظيمه

الدمع مايكفي ولو صب مدرار

ياللشقاء ياللقهر والهضيمه

ياللعذاب اللي بداء معي مشوار

تصبح حياتي كلها دون قيمه

ونور الامل في ناضري ينقلب نار


__________________


خضير البراق..

ليست هناك تعليقات:

إرسال تعليق